JÓGAGANGA UM KJALVEG HINN FORNA
29.JÚNÍ - 2.JÚLÍ 2017

Nærandi - Styrkjandi - Slakandi 

NÚVITUND Í NÁTTÚRU ÍSLANDS; JÓGA, HUGLEIÐSLA OG SLÖKUN 

Mikil streita og álag fylgir oft daglegu lífi og því er nauðsynlegt að passa vel uppá heilsuna. Bæði þá líkamlegu og þá andlegu. Gönguferðin er frábært tækifæri til að vinda ofan af sér eftir annasaman vetur og hlaða batteríin upp á nýtt. 

Lögð er áhersla á þægilegan gönguhraða og ferðaöryggi en leiðsögumaður hefur lokið námskeiðinu “Fyrstu hjálp í óbyggðum". 

LEIÐIN: Gengið er um Kjalveg hinn forna og gist í skálum á leiðinni. Farið er frá Hvítárnesi að Hveravöllum, um lyngivaxnar hlíðar og gróna dali. Meðfram ám, jöklum og fögru útsýni til fjalla og jökla, með söguna við hvert fótmál. Leiðin er falleg, gróin og með lítilli hæðarbreytingu og því tilvalin til að njóta slökunar og jóga í náttúrunni.

Gönguleiðin liggur töluvert langt vestan við akveginn og því verður maður ekki var við bílaumferð. Gengið er meðfram heiðum, fellum og jökulá austan við Langjökul. Í góðu skyggni má sjá Hofsjökul, Kerlingafjöll, vesturhluta Vatnajökuls, Torfajökul og Mýrdalsjökul fyrir utan Langjökul og Hrútfellið. 

Dagur 1:  Reykjavík – Hvítárnes, síðdegisganga rúmlega 5 km og góður tími fyrir jóga.
Dagur 2:  
Hvítárnes – Þverbrekknamúli, 12 km, 100 m hækkun
Dagur 3:  Þverbrekknamúli – Þjófadalir, 14 km, 100 m hækkun
Dagur 4:  Þjófadalir –  Hveravellir, 12 km, 80 m hækkun. Farið í heitu laugina á Hveravöllum áður en haldið er til Reykjavíkur.

JÓGA OG KENNSLA Í FERÐINNI:  Farið er í jóga á morgnana áður en gangan hefst, á leiðinni verða jóga-, hugleiðslu- og slökunarstopp að minnsta kosti tvisvar sinnum fyrir utan hefðbundnar pásur. Einnig verður farið í jóga á kvöldin eftir göngu dagsins. Veðráttan á Íslandi er skemmtilega breytileg og því gefast alltaf tækifæri til jógaiðkunnar á hverjum degi. Jóga er fjölbreytt og því er einnig hægt að aðlaga það breytilegum aðstæðum. Gerðar eru standandi æfingar ef þannig viðrar en oft viðrar vel fyrir sitjandi og liggjandi æfingar. Öndunaræfingar og hugleiðslu er svo hægt að gera í öllum veðrum. Byrjendur jafnt sem vanir geta gert æfingarnar sem koma bæði úr hatha-jóga og kundalini-jóga. Kenndar og þjálfaðar eru aðferðir sem efla með þér núvitund, vinna gegn streitu og efla og viðhalda innri styrk.

ÚTBÚNAÐUR OG MATUR: Bera þarf svefnpoka, fatnað og mat fyrir ferðina og því er mikilvægt að vanda pökkun vel. Nánar verður farið í útbúnað á undirbúningsfundi og þátttakendur fá ýtarlegan útbúnaðarlista yfir útbúnað, föt og mat. Ef farið er eftir leiðbeiningum ætti bakpokinn að verða hæfilega léttur og að hámarki 10 kg með vatni.

Hver og einn kemur með mat fyrir sig að eigin smekk og er jógafæði ekki skilyrði :)  Athugið að fyrsta nóttin er í Hvítárnesi en þangað keyrir rútan hópinn. Heilir göngudagar með allar byrgðar eru því tveir og þyngd vegna matar er því ekki mikil. Lokagöngudaginn er pokinn léttari og einungis eftir dagsnesti af upphaflegum mat. Innifalið í verði er súpa og brauð með te/kaffi á Hveravöllum.

VERÐ: Heildarverð ferðarinnar er 67.000 kr. 10% afsláttur ef bókað er fyrir 10.apríl. Innifalið: Gisting, rúta, leiðsögn og jógakennsla. 
Athugið mögulega niðurgreiðslu frá stéttarfélagi, t.d. fá félagar í KÍ 7.500 kr. orlofsstyrk en greiða 15 punkta og félagar í Ferðafélagi Íslands greiða 6000 kr. lægra verð.  

Verðskilmálar: Við skráningu þarf að greiða 5.000 kr. staðfestingargjald sem ekki fæst endurgreitt ef forföll verða (nema annar þátttakandi komi í staðin). Greiða þarf 12.000 kr til viðbótar 2. maí (endurgreitt er 80% af fyrirframgreiðslum ef afboðað er 2 vikum fyrir brottför eða fyrr en 50% ef afboðað er viku fyrir brottför). Ganga þarf endanlega frá greiðslu í síðasta lagi 2.júní. Takmörkuð pláss.

Hikið ekki við að hafa samband með spurningar og vangaveltur um sérþarfir eða annað.